Бырабыыталыстыба бэрэссэдээтэлин солбуйааччы Айаал Степанов салайааччылаах сир туһунан кэпсэтэр мунньах буолла.

Сир хаһааҥҥытааҕар да наадыйыллар, сыаналанар баайга кубулуйбутун ситэ өйдүү иликпит. Муниципальнай тэриллиилэр дохуот аахсар биир тутаах өлүүлэрэ буолла. Манан сиэттэрэн өссө алтынньы ыйга тыа хаһаайыстыбатыгар туттуллар сирдэри инвентаризациялыыр сорудах бэриллибитэ. Дьэ, ол түмүгүн кэпсэттилэр.
Баай-дуол сыһыаныгар миниистири солбуйааччы Е.Григорьева эппитинэн, билиҥҥитэ 11 муниципальнай оройуон, биир куорат уокуруга уонна 180 тыа поселениета инвентаризацияны барбыт. Поселениелар сирдэрин көдьүүстээхтик туһаныы 191 уонна т/х сирин «районированиетын» 11 схемата оҥоһуллубут. Анаалыс түмүгэ үөрдүбэт. Хоту эҥээргэ туһаттан тахсыбыт тыа хаһаайыстыбатын сирин иэнэ сирдэрин кээмэйиттэн -- 61 %! Ол аата, 49 бырыһыан сирдэрэ көдьүүстүү сытар. Оттон Бүлүү улуустарыгар туһаныллар сир иэнэ уопсай сирдэриттэн 46 %-нын ылар. Өрөспүүбүлүкэ киин өттүгэр, тыа хаһаайыстыбатынан дьарыктанар оройуоннарга сирдэрин 61 % эрэ туһаналлар. Бу биир бэлиэ төрүөтэ – сирдэрэ ырааҕынан, чугаска эрэ оттууллар, чугастааҕыны эрэ туһаналлар. Иккиһинэн, сүөһү аҕыйаабыта кыра сири туһаныыга тиэрдэр. Үсүһүнэн, сири бас билиигэ докумуоннатан ылыы, көрүү-харайыы бытааннык барар.
Онон сири оҥорууга болҕомто өссө күүһүрүөн наада. Сири барытын учуоттуур электроннай база олохтонуохтаах. Хайдах туһанары хонтуруолга ылан, нолуок киириитин эмиэ хааччыйыахха. Землеустроителлэри оройуон таһымыгар ыытар туруорсуу баар. Билиҥҥитэ кинилэр поселение муниципалитетыгар киирсэллэр. Аны, өрөспүүбүлүкэҕэ баар 360 землеустроительтэн үрдүк үөрэхтээҕэ сүүһү да кыайбат.
Комментарии
Сообщение:
Отправить Отмена