Ил Түмэн пресс-сулууспата иһитиннэрэринэн, Саха Өрөспүүбүлүкэтин народнай депутата, Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Елена Алексеева «Биир ньыгыл Россия» «Олох хаачыстыбата (Доруобуйа)» партийнай бырайыага олоххо киириитин туһунан кэпсээтэ.
Саха сиригэр бу партийнай бырайыак координатора Елена Алексеева билигин өрөспүүбүлүкэтээҕи доруобуйа харыстабылын модернизациялааһын 2011-2012 сыллардаах тосхолун федеральнай таһымҥа сөбүлэһиннэрии бара турарын бэлиэтээтэ.
Бу тосхол үбүлээһинэ булгуччулаах медицинскэй страховкалааһын Федеральнай фондатыттан, РФ субъектарын бюджеттарын, булгуччулаах медицинскэй страховкалааһын территориальнай фондаларын бюджеттарын субсидиялааһын суотугар оҥоһуллар. Доруобуйа харыстабылын модернизациялааһын материальнай-техническэй базаны бөҕөргөтүүгэ, информационнай технологиялары – телемедицинаны, бырааска электроннай суруттарыыны, электроннай амбулаторнай каарталары, Россияҕа бүтүннүү биир кэриҥнээх страховка полиһын, медицинскэй көмө стандартарын сайыннарыыга туһаайыллар.
«Олох хаачыстыбата» бырайыагы олоххо киллэриигэ туһаайан Ил Түмэҥҥэ парламеннааҕы истиилэр аастылар, ол түмүктэринэн оҥоһуллубут мэктиэлэр Ил Түмэн пленарнай мунньаҕынан ылылыннылар, диэн этэр Елена Алексеева. Маны кэккэ, бу бырайыак туолуутун чэрчитинэн, депутат Дьокуускайга, Саха сирин улуустарыгар социальнай объектары көрө, медицинаҕа, социальнай эйгэҕэ туох сонун, аныгы технологиялар киирэн эрэллэрин, үлэһиттэр олохторун-дьаһахтарын, үлэлэрин-хамнастарын билсиһэ бара сылдьыбытын иһитиннэрдэ.
Елена Алексеева партийнай бырайыак олоххо киириитин туһунан кэпсииригэр, доруобуйа харыстабылын эйгэтин үлэһиттэрин хамнастарын боппуруоһун эмиэ таарыйда. «Үлэ төлөбүрүн саҥа тиһигэр көһүүнэн сибээстээн, биһиги хамнас үрдээһинин саҥа механизмын үлэлэтиэхтээхпит. Хамнас үрдээһинэ хас да түһүмэҕинэн барыа. Биһиги манна базовай эйгэни барытын кэриэтэ көрдүбүт, үөрэттибит», - диир депутат. Медицинскэй көмө стандартарын туһунан этэригэр, кини хамнас үрдээһинин механизма, бастатан туран, амбулаторнай-поликлиническай сулууспаларга киллэриллэр, диэн чопчулаата.
Партийнай бырайыак олоххо киириитин уонна доруобуйа харыстабылын модернизациялааһыны бэлиэтээн баран, Елена Алексеева Саха сиригэр доруобуйа харыстабылын модернизациялааһын тосхоло олоххо киириитигэр 2011-2012 сылларга барыта 8 млрд. 195 мөл. солкуобай үп көрүллүбүтүн эттэ. Ол иһигэр, 4 млрд. 700 мөл. солкуобай федеральнай бюджеттэн, 2 млрд. 700 мөл. солкуобай республика бюджетиттэн, итиэннэ бюджеттэн ураты үптэн.
Комментарии
Сообщение:
Отправить Отмена