Саха Өрөспүүбүлүкэтин народнай депутата Ольга Макиенко кулун тутар 30 күнүгэр Ил Түмэн государственнай тутулга уонна сокуону оҥорууга сис кэмитиэтин мунньаҕын ыытта, манна гражданнар былаас органнарыгар туһаайан этиилэрин көрүү бэрээдэгэр уларытыылары киллэрэр сокуон барыла көрүлүннэ.
Мунньахха депутаттар Дмитрий Горохов, Анатолий Алексеев, Елена Алексеева, Александр Ким-Кимэн, Александр Гаврильев, Валерий Иванов, президент уонна правительство Администрациятын ис политикаҕа департаменын салайааччыта Александр Соловьев, парламент Аппараатын салайааччыны солбуйааччы – государство-быраап боппуруостарыгар управлениетын начальнига Юрий Бацев, Суут департаменын өрөспүүбүлүкэтээҕи управлениетын начальнига Николай Пестряков, Саха Республикатыгар мировой судьуйалар үлэлэрин тэрийиини хааччыйыы Киин аппараатын начальнига Сергей Трофимов, президент уонна правительство Администрациятын гражданнары кытта үлэҕэ отделын салайааччы Альбина Нусугурова кытыннылар.
Сүрүн боппуруоһунан «Саха Өрөспүүбүлүкэтигэр гражданнар туһаайан этиилэрин көрүү бэрээдэгин туһунан» сокуоҥҥа уларытыылары уонна эбиилэри киллэрэргэ туһуламмыт сокуон барылын көрүү буолла. Бу сокуону Ил Түмэн ылыннаҕына, Саха сирин олохтоохторун олоҕор улахан уларыйыы киирэр кыахтаах.
Сокуон барылын правительство бэлэмнээн киллэрбит. Сыала - өрөспүүбүлүкэтээҕи сокуону федеральнайга сөп түбэһиннэрии уонна хатыланар балаһыанньаларын туоратыы. Президент уонна правительство Администрациятын гражданнары кытта үлэҕэ отделын салайааччы Альбина Нусугурова парламент кэмитиэтин чилиэннэрин болҕомтотун гражданин былаас государственнай органыгар, олохтоох бэйэни салайыныы органыгар уонна дуоһунастаах киһиэхэ туһаайан этиини электроннай докумуонунан да, суругунан да киллэрэр бырааптааҕар тарта. Оттон былаас государственнай органар, олохтоох бэйэни салайыныы органа уонна дуоһунастаах киһи электроннай туһаайан этиигэ эппиэти ыйыллыбыт почта аадырыһыгар ыытар бырааптаахтар.
Депутаттар гражданнар ааттарын, аадырыстарын ыйбакка суруйбут буоллахтарына хайдах эппиэттиибит диэн ыйыттылар. Сокуон барылыгар суруллубутунан, гражданин былаас государственнай органыгар, олохтоох бэйэни салайыныы органыгар эбэтэр дуоһунастаах киһиэхэ электроннай докумуон быһыытынан ыыппыт туһаайыытыгар хайаан да кини араспаанньата, аата, аҕатын ааты, электроннай почтатын аадырыһа, маны таһынан почтанан эппиэти күүтэр буоллаҕына – олорор аадырыһа ыйыллыбыт буолуохтаах. Инньэ гынан, аата-аадырыһа суох киирбит туһаайыы сурук болҕомтото суох хаалар, тоҕо диэтэр, сокуон ирдэбилигэр сөп түбэспэт.
Мунньах кыттыылаахтара сокуон барыла кэмигэр бэлэмнэммитин уонна олус наадалааҕын бэлиэтээтилэр. Саха Өрөспүүбүлүкэтин нэһилиэнньэлээх пууннара бэйэ-бэйэлэриттэн ыраах тайаан сыталларын учуоттаатахха, бу сокуон олоххо киириитэ былаас органнарын уонна гражданнар икки ардыларыгар докумуон сырыытын биллэ түргэтэтиэ.
Ил Түмэн пресс-сулууспата.
Комментарии
Сообщение:
Отправить Отмена