Ил Түмэн депутаттара Муома улууһун делегациятын кытта көрсүстүлэр. Көрсүһүү кэмигэр Муома оройуонун социальнай-экономическай сайдыытын боппуруостара дьүүллэһиннилэр, чуолаан, ыалдьыттар дьиэ-уот, коммунальнай хаһаайыстыба туругун туһунан сиһилии кэпсээтилэр. Маны таһынан Чыбагылаах уонна Муома нэһилиэктэригэр саҥа оскуолалары тутуу туһунан боппуруос көтөҕүлүннэ.
Кэпсэтии сүрүн тиэмэтинэн «Муома оройуона» муниципальнай тэриллиигэ «национальнай эбээн оройуона» статуһу иҥэрии буолла. Улуус Саха сирин хотугулуу-илиҥҥи өттүгэр сытар, манна сахалар, нууччалар, эбээннэр, эбэҥкилэр, юкагирдар уонна да атын омук бэрэстэбиитэллэрэ түөлбэлээн олороллор.
Тыа хаһаайыстыбатын сүрүн хайысхатынан табаны иитии буолар. Маны таһынан бу дойдуга туора муостааҕы, сылгыны, килиэккэҕэ күндү түүлээҕи иитии, бултааһын сайдыбыт.
Республика народнай депутаттара Муома олохтоохторун этиилэрин өйүүллэрин биллэрдилэр, чуолаан – Муома оройуонугар «национальнай эбээн оройуонун» статуһун иҥэрии туһунан боппуруоска.
Петр Васильев.
Комментарии
Сообщение:
Отправить Отмена