«Хаар айан-2011» диэн республикатааҕы «УАЗ» массыыналар күрэхтэһиилэрэ быйыл Нам улууһугар үһүc төгүлүн ыытылынна.
Быйылгы күрэхтэһиигэ Дьокуускай куораттан, Чурапчыттан, Тааттаттан, Уус-Алдантан, Горнайтан, Хаҥаластан, оннооҕор ыраах Томпоттон – барыта республика 10 улууһуттан 32 массыына, 64 суоппар кыттыннылар. Оттон көрөөччү ахсаана быһа холуйан 5 тыһыынча кэриҥэ киһи буолла быһыылаах. Ол күрэхтэһии суолтата сыл аайы үрдээн иһэрин туоһулуур.
Бары массыыналар парадтаан киирэн көрөөччүлэр иннилэригэр туруммуттарын кэннэ күрэхтэһиини үөрүүлээхтик аһыыга Ил Түмэн депутата Николай Румянцев, Нам улууһун баһылыгын бастакы солбуйааччы Николай Слепцов, Россиятааҕы мультиспорт ассоциациятын генеральнай секретара Алексей Кыласов, ФИЛА тустуу үгэс буолбут көрүҥнэригэр комитетын бэрэстэбиитэлэ Гинтас Вилейта мустубут дьону эҕэрдэлээтилэр.
Тыҥааһыннаах, эрийсиилээх күрэххэ күүстэрин холоно кэлбит суоппардары Афанасий Татаринов "Алгыстаах буоллун айаммыт" ырыатынан эҕэрдэлээтэ.
Николай Румянцев 2009 сылга маневрдааһыҥҥа уонна 100 ат күүһүгэр дылы күүстээх массыыналар экстримнэригэр кыайбыт, Тааттаттан сылдьар "Таатта-такси" экипаж чилиэннэригэр Степан, Петр Васильевтарга "Хаар айан" автошоу маастара" диэн бэлиэни туттарда. Маастар аатын ылбыт уолаттар күрэхтэһии былааҕын таһаарар чиэстэннилэр.
Экипажтар, массыыналар анал ааттаахтар. Суоппардар эрдэттэн бэлэмнэнэн, массыыналарын эҥин араас дьэрэкээн өҥүнэн, уруһуйунан киэргэтэн, былаахтары иилинэн кэлбиттэр. Жюри кэрийэ сылдьан массыына төһө тупсаҕай көрүҥнээҕин сыаналаата. Саамай үчүгэйдик киэргэммит "Чаҕылҕан" диэн экипажка 1 миэстэ бэрилиннэ.
Суоппардар формалара эмиэ сыаналанна. Бастакы миэстэни Намтан "Дохсун" экипаж чилиэннэрэ Иннокентий Петров, Сергей Яковлев уруулга олорорго табыгастаах, сахалыы тыыннаах таҥастарын иһин ыллылар.
Бу күн боротуоха кытылын кыйа тоҕуоруһа мустубут дьон тыҥааһыннаах түгэннэри салгыбакка, өрө күүрэн туран көрдүлэр. Экстрим-куоталаһыыга массыыналар түргэнник ыраахтан сүүрдэн кэлэн күрдьүллэн бэлэмнэммит хаар харгыһы туоруохтаахтар. 100 ат күүһүгэр диэри массыыналартан бу харгыһы биир эрэ массыына – Дьокуускайтан сылдьар "Көтүтэр" диэн ааттаах экипаж туораата. Көрүөх бэтэрээ өттүнэ элээрдэн кэлэн, кырдьык да күрдьүгү үрдүнэн көтөн таҕыста. Атыттар батыллан, суоппардар сүүрэн тахсан күрдьэҕинэн хаары хаспытынан бардылар. Онтон 100-тэн тахса ат күүстээхтэр үгүстэрэ бу улахан харгыһы ойон тахсан бэрт кэрэхсэбиллээх түгэни көрөөччүлэргэ бэлэхтээтилэр.
Күрэхтэһии 5 түһүмэҕинэн ыытылынна. Бастакы "Маневренность" түһүмэххэ 1,42 мүн. иһигэр барыларыттан түргэнник бары этаптары туораан Намтан "Чолбон" экипаж (Василий Тимофеев, Семен Захаров) бастакы миэстэни ылла. "Экстрим" түһүмэххэ 100 ат күүһүгэр диэри собуот стандартаах массыыналар күөн көрсүһүүлэригэр Дьокуускайтан "Көтүтэр" (Константин Петров, Валерий Иванов) экипаж бастаата. 100-тэн үөһэ ат күүстээх массыыналарга "Экстрим" кыайыылааҕынан Чурапчыттан сылдьар "Хантер-Чурапчы" экипаж (Андрей Постников, Егор Аржаков) эрэллээхтик кыайда. Биир саамай интэриэһинэйинэн "Хаар айан" 3 төгүллээх кыайыылааҕа Афанасий Большаков кэриэһигэр ыытыллыбыт "Супер-экстрим-гонки" чемпионата буолла. Манна Афанасий бииргэ төрөөбүт быраата Юлиан убайын "Барс" массыынатынан эрэллээхтик бастаата. "Колми" кубогар абсолютнай чемпионакка бары массыыналар кытыннылар. Финалга 4 массыына таҕыста. Тыҥааһыннаах күрэх кыайыылааҕынан Чурапчыттан "Хантер-Чурапчы" таҕыста.
Быйылгы күрэхтэһиигэ канат тардыһыыта диэн сонун көрүҥ киирдэ. Манна улуустартан биирдии массыына кытынна. Бу күрэх көрөөччүлэр интэриэстэрин олус тарта. Уһун эрийсиилээх тардыһыы кэннэ Дьокуускайтан сылдьар, Амма улууһун чиэһин көмүскүүр "Дьөһөгөй" экипаж саамай күүстээх аатын ылла.
Сүрүн бириистэри таһынан "Саамай эдэр кыттааччы" диэн номинация олохтонно. Манна 19 састаах Юлиан Большаков бэлиэтэннэ.
Петр Васильев.
Комментарии
Сообщение:
Отправить Отмена