Красноярскай кыраайга Департамент устудьуоннарын КВН хамаандата финалга кыттар чиэскэ тигистэ. 2008 сыл муус устар 19 күнүттэн сылын аайы Красноярскай кыраай үрдүнэн ыытыллар «Тайга» диэн КВН-нар күрэхтэһиилэригэр быйылгы сезоҥҥа кыттар үрдүк чиэскэ тигистибит. Ол курдук Алексей Собакин ПИ СФУ 3 кууруһун устудьуона күрэскэ кыттыан, сахалары көрдөрүөн баҕарарын үллэстибитигэр, биһиги хап-сабар сэҥээрэн, кыттарга сананныбыт. Хамаандабытыгар 7 киһи буола оҕустубут.
Онтон КВН-ҥа кыттар сурахпытын истэн эрдэ КВН диэни билбит-көрбүт икки Нерюнгри уола хамаандабытыгар эбии күүс-уох биэрдилэр, бэйэлэрэ улахан көмө буоллулар. Аны кыттарбытыгар 40 тыһ. солк. наада буолла. Хата, саҥа хамаанда уонна саха оҕолоро диэн биһиэхэ 20 тыһ. чэпчэтии оҥордулар. Биһиги ол үөрүүлээх сонуну истэн баран, бары харчы көрдүү туруннубут. Күүс-көмө буолбут Ботвич Александр Николаевичка уонна Осипов Никита Никитовичка барҕа махталбытын тириэрдэбит. Бары көхтөөхтүк кыттан, харчынан кыттыһан, бэйэлэрэ ону-маны толкуйдаан 1\2 финалга ааспыппытыгар оҕолорго махтанабын. Барыта 18 хамаанда этибит, таһынааҕы куораттартан, атын сирдэртэн бааллара. Аны туран, бары онно-манна кыттыбыт, сыанаҕа сылдьа үөрүйэх дьон буоллулар. Биһиги маннык састаабынан маннык үрдүк таһымнаах күрэскэ бастакы кыттыыбыт этэ, ол да буоллар биһиги да хаалсыбатыбыт.
Ону таһынан баран өссө үчүгэйдэттибит. Фестивалы аһааччыларга диэн сулус ойуулаах кубоктарын, саамай чаҕылхай хамаанда диэн сүрэхтээн биһиэхэ туттардылар. 18 хамаандаттан 12-тэ аныгыскы түһүмэххэ ааста, биһиги эмиэ олор быыстарыгар киирэ сылдьабыт. Бэйэбит көрдөрүүбүтүттэн олус үөрдүбүт, долгуйдубут. Сахабыт сирин, сахам дьонун Красноярскай кыраай үрдүнэн хайа эрэ салаанан көрдөрпүппүтүттэн, норуот, дьон-сэргэ истиитигэр, билиитигэр таһаарбыппытыттан тус бэйэм киэн туттабын. Инникитин маннык эрэллээхтик өссө үрдүк таһымҥа тахсан иһиэхпит диэн бигэ эрэллээхпин.
Муся Дорофеева, ПИ СФУ 4 куурус устудьуона, «Аартык» хаһыат тутаах эрэдээктэрэ, КВН чилиэнэ.
Комментарии
Сообщение:
Отправить Отмена