Кулун тутар саҥатыгар Беркакит – Томмот – Дьокуускай хайысхатынан тутуллар тимир суол боппуруоһугар өрөспүүбүлүкэ бэрэсидьиэнэ Егор Борисов, бырабыыталыстыба бэрэссэдээтэлэ Галина Данчикова, тимир суол тырааныспарын Федеральнай ааҕыныстыбатын салайааччытын солбуйааччыта Леонид Бершанскай, «Саха сирин тимир суоллара» ААУо АХ салайааччыта Василий Шимохин уонна да атын үгүс тустаах салайааччы, бэрэстэбиитэл кыттыылаах сүбэ көрсүһүү ыытыллыбыта.
Манна Леонид Бершанскай ааспыт 2010 сыллааҕы түмүктэр уонна бу сыллааҕы былаан туһунан иһитиннэрбитэ. Онно РФ бырабыыталыстыбатын бэрэссэдээтэлэ сорудаҕынан сотору кэминэн Беркакит – Томмот – Дьокуускай хайысхатынан тимир суол иккис түһүмэҕин тутуу туһунан быһаарыы ылыллыахтааҕын иһитиннэрбитэ. Оннук түгэҥҥэ Өлүөнэ өрүһү туоруур муоста боппуруоһа бүтэһиктээхтик быһаарыллыахтаах.
Ол эрээри тимир суол ыы муннубутугар кэлэн анньылларын кэтэһэн олорор сыыһа. Ол да иһин, бу күннэргэ Кэрдэм ыстаансыйаҕа диэри таһаҕаһы аҕалыы уонна сүөкээһин-тиэйии боппуруоһун туһунан дьаһаныылар бара тураллар. Ол курдук, Василий Шимохин адьас сотору кэминэн бу ыстаансыйаҕа диэри таһаҕаһы аҕаларга бэлэмин туһунан иһитиннэрэн турар. Таһаҕас тиэллиитин уонна чөл аҕалыллыытын хааччыйыы «АЯМ-ы тутааччылар ассоциациялара» ААУо-ҕа сүктэрилиннэ. Бастакы сырыынан «Сахазернопродукт» ААУо таһаҕаһа кэлэрэ былааннанар.
Ол кэннэ араас тэрилтэлэр уонна биирдиилээн да дьон таһаҕастарын Кэрдэмҥэ диэри тимир суолунан аҕалар кыахтара үөскүөҕэ. Онон кэккэ табаарга сыана өтөрүнэн чэпчиэ, тимир суол экэниэмикэ өттүгэр бэйэтин үтүө өрүтүн көрдөрүө диэн эрэл баар.
Комментарии
Сообщение:
Отправить Отмена