Бэҕэһээ, кулун тутар 16 күнүгэр, «Интерфакс» информация агентствотын Уһук Илиннээҕи салаата Саха сиригэр бэйэтин тэрилтэтин арыйбыт үөрүүтүгэр өрөспүүбүлүкэ президенэ Егор Борисов пресс-кэмпириэнсийэни тэрийдэ. Кэпсэтиини «Интерфакс» агентство регионнарга сулууспатын генеральнай дириэктэрэ Елена Почеснева салайан ыытта. Бу киэҥник биллэр сонун ситимэ 25-с куоратыгар – Дьокуускайга бэйэтин тэрилтэтин арыйда.

Ити Саха сирэ Арассыыйа таһымыгар бары өттүнэн суолтата үрдээбитин, дойду сонуннарын биир дьоһуннаах киинигэр кубулуйбутун кэрэһэлиир. Аҕа баһылык суруналыыстар үгүс ыйытыктарыгар хоруйдаата. Кэпсэтии тиэмэтэ былаас, уопсастыбаннай тэрилтэлэр уонна СМИ икки ардыларыгар сыһыан туһунан. Ол чэрчитинэн, Егор Борисов өрөспүүбүлүкэ Уопсастыбаннай палаататын туһанан кэпсээтэ. Биллэрин курдук, Уопсастыбаннай палата туһунан өрөспүүбүлүкэ сокуонун барылын Ил Түмэн бастакы ааҕыыга ылынан турар. Аҕа баһылык бу сокуон төһө кыалларынан түргэнник ылыллыахтааҕын туһунан этиитин өйөөннөр, дьокутааттар сокуону муус устар 14 күнүгэр бүтэһиктээхтик ылыныахтаахтар. Егор Афанасьевич былаас бүтүн өрөспүүбүлүкэ сайдыытыгар туһуланар туох баар боппуруостары бэйэтэ эрэ быһаарар кыаҕа суоҕун эттэ. Итиннэ уопсастыба хайаан да кыттыһыахтаах. Биллэн турар, Саха сирин салалтата дьон-сэргэ тугунан тыынарын билбэт диир кыах суох. Холобур, сыллата туох баар улуустарынан, нэһилиэктэринэн ыытылллар бырабыыталыстыба отчуоттара, араас социологическай чинчийиилэр. Ол гынан баран быһыыны-майгыны мэлдьи билсэ туруохха наада. Уопсастыбаннай палаатаҕа биллиилээх эрэ дьон буолбакка, уопсастыба бары араҥатыттан бэрэстэбиитэллэр талыллыахтара. Саамай кылаабынайа, бу дьон Саха сирин туһугар ис сүрэхтэриттэн ыалдьар буолуохтаахтар. Оттон СМИ сүрүн оруолун туһунан Егор Борисов маннык эттэ: быһыы-майгы тэтимнээхтик уларыйа турар кэмигэр олоробут; үгүс дьон кэм-кэрдии ирдэбилин, сокуоннарын кыайан ылыммат; манна СМИ дьоҥҥо-сэргэҕэ сөптөөх информациянан көмө буолуохтаах.

kyym.sakha.ru
17.03.2011 13:48 | оригинал статьи | просмотров: 17070