Хас биирдии сыл саҕаланыытыгар сыллааҕы былаан, сорук-соргу торумнанар идэлээх. Ол сиэринэн ТХМ быйыл да сүөһү ахсаанын элбэтэр, олохтоох аһы-үөлү тупсарар, сайыннарар санаалааҕын биллэрэр. Ааспыт сылга баалабай бородууксуйа кээмэйэ 18,2 млрд солк. тэҥнэспитэ, бу 2009 с. көрдөрүүтүттэн намыһах.

Былаан быһыытынан, быйылгы сылга өрөспүүбүлүкэ үрдүнэн сүөһү ахсаанын 234 872 (о.и. ынаҕа — 88 400), сылгыны 163 640, сибиинньэни 29 400, дьиэ табатын 207 000, көтөрү 942 450-ҥа тиэрдэр соруктаахтар.

Быйыл эт былаана 40,5 тыһ. т тэҥнэһэр, үүккэ – 192 тыһ. т үүт диэн этиллибит. Маны сэргэ 125 тыһ. устуука куурусса сымыыта ылыллыахтаах. Быйыл 14, 0 тыһ. туонна бурдук, 70,5 тыһ. туонна хортуоппуй, 31 тыһ. туонна оҕуруот аһа үүннэриллиэхтээх.

Бэлиэтээн эттэххэ, ааспыт сыл түмүгүнэн, ол иннинээҕи 2009 сыл туһааннаах кэмигэр тэҥнээтэххэ, бурдук, хортуоппуй ыһар сир уопсай иэнэ 1,5%-нан кыараабыт. Хата диэххэ, 38,7%-нан элбэх бурдук уонна 3,7 %-нан элбэх хортуоппуй хомуллубут.

Сүөһү чуолаан Өлүөхүмэ, Уус Алдан, Мэҥэ Хаҥалас, Ньурба улуустарыгар биллэ аҕыйаабыт. Маныаха хас да төрүөт баара ыйыллыбыт: дохуот кырата, үлэ ыарахана, ыччат тыаттан тэйэрэ, ону таһынан халаан содула.

Сүөһү аҕыйаан, үрүҥ илгэбит, 2009 сылга тэҥнээтэххэ, бэлиэр 4%-нан түспүт.

kyym.sakha.ru
11.03.2011 09:09 | оригинал статьи | просмотров: 18583