Дирбиэннээх-дарбааннаах «Чыҥыс Хаан» киинэбит табыллыбатаҕыттан сэдиптээн баар-суох судаарыстыбаннай киинэ хампаанньабытыттан ытыс соттор турукка киирдибит. Култуура уонна духуобунай сайдыы миниистирэ Андрей Борисов бэйэтэ тутан-хабан уһулбут, 300 мөлүйүөн бюджеттаах «Тайна Чингис Хаана» киинэтэ, орускуотун толумматах буруйа «Сахафильмҥа» түстэ.

Тэҥнээн көрдөххө, «Снайпер Саха» бюджета 17 мөлүйүөн этэ. Тэҥнээн көрүҥ уонна хайа киинэ, ханнык режиссер тугу, хайдах устарын. Андрей Саввич Борисов улуу, гениальнай режиссер. Ол гынан баран театральнай. Эрдэ «театр уонна киинэ тус-туһунан искусстволар» диэн этэ сатаабатахтара буолуо дуо? Этэн. Биирдэ эрэ буолбатах.

Миниистир тус амбициятын ханнараары, тустаах киинэ үлэһиттэрин чугаһаппакка устубут киинэтэ ороскуотун үс гыммыт биирин эрэ саппыт. Инньэ гынан, чуолаан киинэ уһулларыгар үбү түмэр (сиир?) «Үргэл-В» ХЭО тэриллэн, «Нижнее-Ленскэй» АО-ттан, «РИК» АО-ттан холбоон 70 мөлүйүөн солкуобай иэс ылбыт. Төннөрөөрү. Ол гынан баран киинэбит (сымнатан эттэххэ) сатаммакка, орускуотун толуйбатах.

Билигин ол «Үргэл-В» иэһин суотугар «Сахафильмы» «нижне-ленскэйдэргэ» уонна «риктэргэ» анньан биэриэхтээхтэр. «Сахафильм» миниистир киинэтигэр ханан да кыттыбатах тэрилтэ эрээри, иэс-күүс баайсыытыгар бастакынан анньыллан эрэрэ тустаахтарга кыһыылаах бөҕө буоллаҕа. Сатахха, адьырҕалар аппетиттарын көтөҕөөрү диэбиккэ дылы, соторутааҕыта «Сахафильмҥа» «Лена» киинэ театрын биэрбиттэрэ. «Лена» балаансаҕа турар сыаната 92 мөлүйүөн. Итини таһынан киинэ хампаанньатыгар 20-ччэ дьиэ-уот баар.

«Сахафильмы» моҥкурууттатан баран, атын чааһынай киинэ хампаанньата тэриллиэхтээх. Киинэ диэн идеологияны оҥорор искусство буоллаҕа. Саамай күүстээх, дьайыылаах, суолталаах. Бэл, Ленин киинэ күүһүн ааспыт үйэ саҕаланыытыгар чорботон бэлиэтээн турар. Чааһынай аата чааһынай. Хайдах тыыннаах, идеологиялаах киинэни устарын көрбүттээҕэр сэрэйбит ордук. Иитэр, үөрэтэр үлэ барыһа суох буолан кэтэххэ тутуллуо, ол оннугар өлөрсүүлээх, күүс өттөйүүлээх, эбэтэр солуута суох саататар эрэ аналлаах киинэлэр (харчы киллэрэр жанрдар) уһуллуохтара. Бүттэхпит ол.

«Сахафильмы» Бастакы президент тэрийдэҕэ. Онон даҕаны, уонна Михаил Ефимович саха киинэтэ судаарыстабаннай эрэ бас билиилээх түбэлтэтигэр дьылҕата уһуурун билэрин оҕото сыттаҕа, «сахафильмнары» көмүскээн, билиҥҥи президент аатыгар сурук суруйбутун интернеккэ таһаардылар. Онон М.Е.Николаев ылсыбыт буоллаҕына дьыала оннун-туойун булуо диэн эрэнэбит.

kyym.sakha.ru
10.03.2011 10:38 | оригинал статьи | просмотров: 14800