Кэлиҥҥи кэмҥэ дойду араас куораттарыгар, бэл диэтэр кыраныысса таһыгар баран үөрэнэр, улэлиир эдэр дьон элбээтэ. Ол курдук, Горнай ыччата билигин Сахалинскай уобаласка үөрэнэ, улэлии сылдьар Кеша Потаповы кытары төлөпүөн нөҥүө кэпсэтэн, ыйытыыларбар эппиэттииригэр көрдөстүм:
— Кеша, бэйэҥ тускунан кыратык кэпсээ эрэ. Хантан төрүттээххиний, ханна үөрэммиккиний?
222_copy— Мин Горнай Күөрэлээҕиттэн сылдьабын. Дьонум-сэргэм онно олорор. Ийэм, Р.С.Потапова — начаалынай кылаас учуутала, аҕам, И.П.Потапов — технология учуутала, иккиэн Күөрэлээх орто оскуолатыгар үлэлииллэр. Бииргэ төрөөбүт балтылаахпын, эдьиийдээхпин. IX кылааска диэри дойдубар үөрэммитим, X кылаастан олимпийскай эрэллэри бэлэмниир училищеҕа киирбитим. Училищеҕа киириэм иннинэ боксанан дьарыктаммытым. Спорка сыһыарбыт, кыайыы өрөгөйүн билэр дьолу биэрбит маннайгы тренербэр М. А. Владимировка махталым мунура суох.
—Тыа оскуолатын кэнниттэн хайдах Сахалинскай уобаласка тиийэн хааллыҥ?
— Үөрэҕим кэнниттэн армияҕа ыҥырыллыбытым. Хабаровскай, Уссурийскай кыраайдарга, Сахалинскай уобаласка сулууспабын ааспытым. Бу кэмҥэ бокса тренерэ А.Г.Фоминскай секцияҕа ыныран дьарыкпын саҕалаабытым. Сулууспам кэмигэр Сахалинскай уобалас араас таһымнаах курэхтэһиилэригэр кыттан, чемпион буолбутум.
Бириэмэбин сутэримээри, Саха сиригэр көһөттөрүөм диэн санаалаах, Сахалиннааҕы университекка кэтэхтэн үөрэнэ киирбитим.
2009 с. этэҥҥэ сулууспалаан, Саха сиригэр дойдубар кэлбитим. Үөрэнэр университеппын сөбүлээн, хааларга соруммутум.
— Кэтэхтэн үөрэнэр киһи тугунан эрэ дьарыктанаҕын?
— Сахалинскай уобалас Корсаковскай оройуонун Соловьевка диэн бөһүөлэгэр идэбинэн оскуолаҕа физкультура учууталынан, боксаҕа тренеринэн үлэлиибин. Маны таһынан дьоппуоннуу мини-волейболга секциялаахпын, бэйэбит хамаандалаахпыт. Сүрүн үлэм таһынан Арассыыйатааҕы оборона спортивнай-техническэй тэрилтэтигэр (ДОСААФ) спортивнай секторга баарбын.
— Мин билэрбинэн, эн олоххо сүрдээх актыыбынай позициялааххын, туруоруммут сыалгын тиһэҕэр тириэрдэҕин. Онон сиэттэрдэххэ, үлэҥ түмүктээх, сөбүлүүр дьарыгын кыайыылаах буолуо?
— Боксаҕа биирдиилээн үөрэнээччилэрим курэхтэһиилэргэ миэстэлэһэллэр. Сахалинскай уобаласка бастыыр иһин күрэхтэһиилэргэ былырыын икки, быйыл үс иитиллээччим I миэстэлэри ыллылар. Биир үөрэнээччим былырыын Дальнай Восток күрэхтэһиитигэр II миэстэни ылары ситиспититтэн, мин, тренер быһыытынан, үлэм түмүгэ сыаналаммытыттан үөрэбин.
Боксанан эрэ буолбакка, спорт араас көрүҥнэригэр үөрэнээччилэрбин умсугутабын, күрэхтэһиилэргэ кытыннарабын. Саха буоларбынан киэн туттан, нуучча оҕолоругар хапсаҕай, мас тардыһыы, кылыы курдук спорт көрүҥнэрин билиһиннэрэбин, үлэбэр туттабын. Саха омук спортивнай көрүҥнэрин биир идэлээхтэрим кытта интэриэһиргээн, бэйэлэрин кыахтарын холонон көрөөччүлэр.
Бэйэм ситиһиилэрим туһунан кэпсиир буоллахха, киһиргээбэккэ эттэххэ, боксаҕа Сахалинскай уобалас түөрт төгүллээх чемпиона буолабын.
Куруутун спортивнай саалаҕа, бокса рингатыгар эрэ сылдьыбаппын. Үөрэх, өй үлэтигэр эмиэ актыыбынайдык кытта сатыыбын. Соторутааҕыта "Самобытные игры и национальные виды спорта народов северо-востока Азии" норуоттар икки ардыларынааҕы научнай-практическай конференцияҕа кыттыбытым. "Самобытные виды спорта народов Республики Саха (Якутия)" диэн дакылааты бэлэмнээн аахпытым. Слайд нөҥүө Саха сирин, ыһыах хаартыскаларын, практическайбар салаабар мас тардыһар тэрили бэйэм оҥорон, устудьуоннары кытыннаран, мас тардыһыннаран көрдөрбүтүм. Япония Хоккайдо университетыттан сылдьар бэрэстэбиитэллэр сэҥээрбиттэрэ, ыйыталаспыттара. Бу дакылааппынан "За вклад в развитие Сахалинского государственного университета" Махтал суругу туттарбыттара.
— Кистэлэҥ буолбатах, Арассыыйа араас муннуктарыгар омугунан арахсыы көстөр түгэннэрэ бааллар. Тус бэйэҥ ити кыһалҕаны көрсүбүтүҥ дуо?
— Саха сириттэн манна уратыта элбэх: дьон менталитета, айылҕата, салгына. Сахалиҥҥа элбэх араас омуктар бааллар: кэриэйдэр, кавказ омуктара, кытайдар, американецтар уо.д.а. Атын омук диэн туораппаттар. Мин санаабар, омугуттан тутулуга суох, хас биирдии киһи бэйэтин иннин көмүскэниэхтээх. Соҕотоҕуттан, элбэҕиттэн тутулуга суох, тус бэйэтигэр эрэллээх киһини атаҕастаабаттар дии саныыбын.
— Түгэнинэн туһанан, дойдугуттан ыраах сылдьар киһи биир дойдулаахтаргар тугу тириэрдэҕин?
— Биир дойдулаахтарбар, дьоммор-сэргэбэр, табаарыстарбар ыраах сытар Сахалин арыытыттан төлөннөөх эҕэрдэбин тиэрдэбин! Сандал саас кэлбитинэн итиитик-истиҥник эҕэрдэлиибин!
Виктория Петрова
Горнай улууьа.
Комментарии
Сообщение:
Отправить Отмена