Олунньу 27 күнүгэр, Москватааҕа ГУВД Култуурунай киинигэр, саха кыыһа Саина, сценаҕа ыллаабытын 15 сылыгар анаан улахан концерт тэрийдэ.
Син балачча улахан саалаҕа, үксүн ыччат уонна ветеран пенсионердар муһуннулар. РФ президенин дьаһалтатыгар Саха Өрөспүүбүлүкэтин бастайааннай бэрэстэбиитэлэ Александр Акимовы көһүтэн, ырыа-тойук кыратык тардыллан саҕаланна.
Саха эстрадатын сулуһа -- Саина, Москва сценатыгар үктэммитэ икки сыл буолла. Айар киэһэтин бэлиэтиир дьоротун тойуктан, хомустан саҕалаата. Манна даҕатан бэлиэтээтэххэ, былырыыҥҥы концерыгар Саина эмиэ хомустаабыта. Быйыл оонньуур техниката өссө уустугурбут: илиитинэн таарыйбакка эрэ тылынан араас дьикти дорҕооннору таһаарда.
Былырыын Саина "Дэгэрэҥ" диэн ансаамбыл тэрийбитэ. Ансаамбыл икки чаҕылхай сулусчааннара -- Юлия Иннокентьева уонна Бориса Емельянов суох буолан, быдан сүүйтэриилээхтик көһүннэ. Ол оннугар бу концерка саҥа устудьуон кыыс «чаҕылыҥнаата». Анастасия Казакова Дьокуускай туһунан ыллаан көрөөччүнү улаханнык манньытта. Ис иһиттэн иэйэн тахсар намыһах куолаһа күүстээх музыканы кытары холбоһон уйулҕабытын хамсатта. Өймөкөөнтөн төрүттээх олус мааны дьүһүннээх кыыс Саина концерын уратытык киэргэттэ.
Саина былырыыҥҥы концерыгар сааланы хамсатан, үҥкүүлэтэн-битиилэтэн ааспыт эбит буоллаҕына, быйыл оннук соругу туруорбатах. Араас омук тылынан намыын, сыыйыллаҕас, холку ырыалары ыллаата. Ырыаларын ийэтигэр, тапталлааҕар анаата. Эбэҥки бастакы композиторын Надежда Докалованы истиҥник санаан-ахтан ааста. Кини Саинаҕа анаан «Орончикаан» диэн суруйбут ырыатын Москва аранжировщиктарыгар (бу дьон өҥөтүн Филипп Киркоров, Валерия туһаналлар) оҥотторбутун ыллаан иһитиннэрдэ.
Хотугу норуоттар ырыаларын сэргэ дьиҥнээх идэтийбит гитарист доҕуһуоллаах испанскай ырыаны ыллаата. Эдит Пиаф, Глория Гейнор ырыаларын ыллаата. «Ханнык омук тылынан ыллаатым да, ол аата ол омугу кытары доҕордоспуппун», -- диэн кини эттэ. Бүрээт доҕоттордоммутун туоһулаан бүрээттии эмиэ ыллаата. Онтон ийэ туһунан казахтыы ыллаата. Ырыа кэнниттэн сценаҕа поэтесса Турсуна Оразбаева баһылыктаах казахтар диаспораларын дьоно таҕыстылар. Саинаҕа анаан элбэх итии-истиҥ тылы эттилэр уонна улахан тапталларын бэлиэтээн чапан (омуктарын таҥаһын) бэлэхтээтилэр.
Биир түгэҥҥэ уот холбонно, тыас-уус сүттэ онуоха саалаттан чиҥ-чиҥник үктэтэлээн сценаҕа Александр Акимов таҕыста. Бу сырыыга Александр Константинович бэрт өрө көтөҕүллүбүт, иэйбит көрүҥнээҕэ. Саха дьахталларын тоҥ буору тобулар күүстээх санаалаах ньургуһуннарга холоото, Өлүөнэ кытылыгар кытаран-наҕаран турар кыраһыабай сардааналарга тэҥнээтэ. Саина 1 канаалга «Поле чудес» биэриигэ олус үчүгэйдик кыттыбытын аҕынна. Түмүгэр, дизайнер анаан-минээн оҥорбут, таҥмыт сибэккитин дьөрбөтүн бэлэхтээтэ уонна Саинаны «постпредство штаты таһынан үлэһитэ» диэн хайҕаата. Кини кэлиэҕиттэн ыла Москва ыһыаҕа далааһыннанна диэн эттэ. Быйылгы ыһыах эмиэ Коломенскайга, бэс ыйын 11-гэр ыытыллыа диэтэ.
Акимов сиэрэй джемпердээх, пиджактаах сылдьар этэ. Онон сылыктаатахха, бэйэтэ сынньана, дуоһуйа кэлбит эбит.
Саина концертарыгар көрөөччүнү кытары истиҥник кэпсэтэр, итэҕэтэр, күлэр-үөрэр үгэстээх. Бу сырыыга эмиэ улахан сонунун кэпсээтэ -- үһүстээн (!) «Поле чудес» биэриигэ уһуллубут. Саина «Чукотка» диэн ансаамбылы кытары уһуллубут биэриитэ кулун тутар 25-гэр көстүөхтээх! Аркадий Алексеев «Якутяночкатын» ыллаан былааһы ылан кэбиспит, инньэ гынан төрдүстээн уһулларга ыҥырбыттар! Дьэ, диэтэҕиҥ.
Иккис улахан сонунан -- «Чукотка» ансаамбылы кытары омук сиригэр гастролга бараары сылдьар эбит. Кинилэри кытары бииргэ бэлэмнээбит нүөмэрдэрин көрдөрдө. Хамсаныылаах-имсэниилээх, тэтимнээх ырыа концерт бүтэһигин өссө киэргэттэ. Саина Дьокуускайга сылдьан сахалыы таҥаһы улаханнык таҥныбат этэ да диэххэ сөп. Бу сырыыга наһаа кыраһыабай, дьэрэкээн, саарбалаах-саһыллаах, оҕуруолаах-оһуордаах сахалыы таҥаһы таҥныбыта туох да дьону барытын умсугутта! Инньэ гынан, нүөмэрдэрин иккистээн толордулар.
Түмүк тылы "Якутское представительство в Москве" ГУ генеральнай дириэктэрэ Борис Лапардин эттэ. Туох да улахан аҕай корзина муҥунан сибэкки арааһын бэлэхтээтэ. «Москва аана таас асфальт кэриэтэ кытаанах, ыарахан, ону нарын-намчы Саина дөбөҥнүк сэгэттэ», -- диэн эттэ. Хардатын ырыаһыт «Арассыыйаҕа уонна аан дойдуга тахсар санаалааҕын, ханнык да түгэҥҥэ ыратын ыһыктыбатын» эттэ.
Дьон концерды олус астынна. Бэл, бүппүтүн да кэннэ өргө диэри тарҕаһан биэрбэккэ бэйэ-бэйэлэрин кытары ирэ-хоро кэпсэтэ олорбуттара. Саина концерын билиэттэрэ каассаҕа атыыламматахтара, постпредство иһигэр эрэ «бэйэ дьонугар» тарҕатыллыбыттара. Онон постпредстволар бары «көһөн» кэлэн олороллоро.
Саина доҕоро Владимир Мишуков концерт иннинэ фойеҕа ыалдьаттары көрсүтэлии турар этэ. Онтон концерт кэмигэр тапталлааҕыттан хараҕын араарбакка истиэнэҕэ өйөнөн турара.
Концерт кэнниттэн, эрдэ эрэннэрбитин курдук, киилэтин 6-лыы мөһөөккө ыыһаммыт уомулу атыылаабыта. Кини таһыгар Саина чукоткатааҕы доҕотторо кыһыл искэҕи атыылаабыттара. Балыгы сэргэ көмүс киэргэллэр эмиэ бааллара.
Түмүктээн эттэххэ, Саина концера олус табыллынна, дьону-сэргэни улаханнык сэргэхситтэ. Талааннаах кыыспытыгар санаата, ырата туоларыгар баҕарабыт!
Саргылаана ДАНИЛОВА,
Москва к.
Комментарии
Сообщение:
Отправить Отмена