Олунньу 18 күнүгэр, аатырбыт «Дозордары» суруйбут, үөс сиртэн ыҥырыллан кэлбит фантаст-суруйааччы Сергей Лукьяненко хараҕа көҕөрүүлээх олорон суруналыыстары кытары көрсүстэ. Онон бастакы ыйытыы «ким хараххын баста?» диэн буолла.
Онуоха Лукьяненконы кытары сэргэстэһэ олорор «Аврора» продюсердыыр киин генеральнай дириэктэрэ Дмитрий Ефимов «суруйааччыга тапталгытын туоһулаан көҕөрүүнү фотошоптаан кэбиһиҥ» диэн көрдөстө.
Суруйааччы бэйэтэ күлэ түһэн баран «икки нэдиэлэ ыннараа өттүгэр хайыһардыы сатаабыта табыллыбатаҕын» эттэ, «бастаан хара ачыкы кэтээри гыммытым, онтон син биир дьон өйдөөн көрөн ыйыталаһыаҕа» диэн кэппэтэх үһү.
Лукьяненко Саха сирин олус сэҥээрэрин этэр. «Атын планета» курдук диир. Улахан, киэҥ сиргэ биир мөлүйүөн киһини аҕалан олордон кэбиспиттэрин курдук, бу дьон туспа олорон ураты цивилизация туталлар, маннык уопут киһи-аймах атын планеталары баһылыырыгар наада буолуо этэ диэн санаалаах.
Сергей Лукьяненко «Дозордар» кинигэтэ Германияҕа 20 тыһ. экземплярынан бэчээттэнэн тахсыбытын кэпсээтэ. Арассыыйа суруйааччылара (кэнникилэр) итиччэ элбэх тирааһынан тахсаллара бэрт сэдэх көстүү эбит.
Лукьяненко элбэх кинигэлээх эрээри, чуолаан «Дозордарынан» эрэ аатырда. Билигин кини 5-с «дозорун» суруйа сылдьар эбит. «Эргэ пижама курдук буолла, өҥө-түүтэ баранна эрээри, сылааһа-сымнаҕаһа дьикти» диир. Өссө хал буолан «дозордарын» барыларын «өлөртөөн» кэбиһээри гыммыт, онтон кэргэнэ «Конан Дойль Шерлок Холмсун тилиннэрбитин курдук тилиннэрэ сатыаҕыһ» диэбитигэр геройдарын тыыннарын уһаппыт.
Лукьяненко иннигэр Саха сиригэр Андрей Геласимов, Дмитрий Глуховскай диэн Арассыыйаҕа биллэр-көстөр аныгы суруйааччылар кэлэ сылдьыбыттара. Бу суруйааччылар бука бары «Ааҕар Саха сирэ» бырайыак иһинэн манна кэлэллэр.
Комментарии
Сообщение:
Отправить Отмена