Бүгүн «Уус-ЭКСПО» быыстапка дьаарбаҥка үлэтин саҕалаата. «Кружало» эргиэн киинигэр ааттаах-суоллаах саха уустарын сэргэ саҥардыы тимир уһаарары баһылаан эрэр эдэр уустар кытталлар.

Саха сирин үгүс муннуктарыттан бу быыстапкаҕа аат ааттаан кэлбит дьон үгүс. Атыылаһааччылар хас биирдии уус оҥоһуктарын үрдүгэр үмүөрүһэ сыталларыттан быһаардахха, дьон маннык тэрийиилэри олус сэргиир эбит. Эр дьон, омугуттан тутулуга суох, саха быһаҕын сыаналыыллар.

Саха уһаарбыт тимирэ уратытын туһунан киирии тылга Б.Ф. Неустроев - Мандар Уус, К.Д.Уткин - Нүһүлгэн, Айсен Николаев, Ил Түмэн дьокутаата Руслан Платонов эттилэр. Мандар Уус «оҕо төрөөтүн кытары биһигин аллараатыгар быһыччыны уураллара, анараа дойдуга аттаныыга киһи этэрбэһин оһугар быһыччылаах барара» диэн этэр. Сахаҕа быһах ол курдук суолталаах эбит.

Оттон саха быһаҕа төһөҕө атыыланар эбит буоллаҕай диэн ыйытар дьоҥҥо этэбит: 3 тыһыынча солкуобайтан саҕалаан 100 тыһыынчаҕа тиийэ сыаналанар.

kyym.sakha.ru
17.02.2011 16:10 | оригинал статьи | просмотров: 20490