Мин 2010 сыл ахсынньытыгар Мэҥэ-Хаҥалас Аллара Бэстээҕэр баар Абалаах санаторийга доруобуйабын чэбдигирдиммитим.

Санаторийга чэбдигирдии араас ньыматын: массаһы, эмтээх ууга сөтүөлээһини, бадараанынан, иннэнэн, уотунан эмтэниини туһаналлар эбит. Уонна санаторий киһиэхэ биир саамай туһалаах эмэ - минеральнай уу буоларын бэйэм эппинэн-хааммынн итэҕэйдим. Мин, 80 саастаах киһи, үйэм тухары өссө Сэбиэскэй былаас эрдэҕинэ, араас санаторийдары кэрийэн үгүстүк эмтэммитим, онон тэҥниир кыахтаахпын.

Биһиги Сахабыт сирин Абалааҕын минеральнай уута ханнык да аатырбыт Арассыыйа, Кавказ, омук сирин санаторийдарын уутуттан хаалсыбат, өссө ордук, туһалаах эбит! Абалаах уута уонна эмтээх бадаарана ис-үөс, оһоҕос, сүһүөх, уҥуох, ньиэрбэ ыарыыларыттан, дьахтар оҕоломмот буолуутуттан эмтиир. Үрдүттэн олорон эрэ ону үгүс киһи өр сылларга ситэ билбэтэхпит. Ыраах, атын сиргэ элбэх үбү-харчыны, сыраны-сылбаны бараан эмтэнэрдээҕэр бэйэбит дойдубутугар эмтэммиппит, чэбдигирдиммиппит, дьиҥэр, быдан ордук. Санаторий үлэһиттэрэ да киһи астынар гына ыарыһахха сыһыаннаһаллар, ол эрээри, хомойуох иһин, кинилэр үлэлиир, дьон эмтэнэр усулуобуйалара олус мөлтөх - санаторий дьиэтэ олус эргэ, аныгы ирдэбиллэргэ хоруйдаабат. Аны туран, үлэһит ахсаана тиийбэт, штаттара кырата бэрт, холобур, түүҥҥү медицинскэй сиэстэрэ диэн ыарыһахтар сытар корпустарыгр көрүллүбэт. Эмтэнээччилэр ортолоругар кырдьаҕас дьон элбэх, кинилэр хаһан баҕар бэргээн ылыахтарын, медицинскэй көмөҕө наадыйыахтарын сөп, онон түүҥҥү дьуһуурустуба олохтоноро буоллар. Оттон саамай улахан баҕа санаа, биһиги республикабыт президениттэн, правительствотыттан көрдөһүү - Абалаах эмтээх күөлүн таһыгар аныгылыы тупсаҕай санаторий саҥа эмтэнэр корпуһун тутуу буолар. Мин санаабар, төһөлөөх Саха сирин олохтооҕо абыраныа, махтаныа этэй?! Кэлин Абалаах эмтээх бадараанын, минеральнай уутун туһунан киэҥник, үчүгэйдик сырдаттахха, рекламалаатахха атын да куораттартан, дойдуттан Саха сиригэр кэлэн эмтэнэр баҕалаах элбиэ этэ. Оччотугар республика санаторий саҥа корпуһун тутуутугар куппут үбэ-харчыта толуйуллар, ону ааһан хас да бүк элбээн, барыһы киллэрэр кыахтаах. Билигин сир-сир аайы таҥара дьиэтин тутуунан үлүһүйэн тураллар, онно төһө саха киһитэ тоҕуоруһа мустара, күргүөмүнэн сылдьара буоллар диэн санаа миигин үүйэ-хаайа тутар. Арай ол оннугар Абалаахха санаторий саҥа дьиэтэ тутуллан хааллын?!

Хаһыат нөҥүө санаторий үлэһиттэригэр ыарыһахха болҕомтолоох, сылаас сыһыннарын иһин барҕа махталбын биллэрэбин уонна үлэлэригэр салгыы сайдыыны, ситиһиини, олохторугар барыта этэҥҥэ буолуон баҕарабын! Биһиги президеммит, үрдүкү салалтабыт дьон доруобуйатын туһугар дьиҥнээхтик кыһаллар буоллаҕына, Абалаахха аныгы санаторий дьиэтин тутуо диэн эрэнэбин.

Анастасия Ивановна Васильева, тыыл, үлэ ветерана, Дьокуускай куорат.

www.kyym.ru
04.02.2011 10:29 | оригинал статьи | просмотров: 15675