Ньурбатааҕы филиал дириэктэринэн былырыын Туйаара Молукова анаммыт. Салалта, үлэһиттэр тылларын тамаҕыттан сылыктаатахха, дьон-сэргэ кинини олус бэркэ ылыммыт, биһирээбит-сөбүлээбит. Туйаара Николаевна ол иннинэ Дьокуускайга «Саха» НКИК-кэ редактор-режиссерунан үлэлээбит эбит. Устуудьуйаҕа үлэлиир эр бэрдэ дьүһүннээх эдэркээн, лиһигирэспит уолаттар «кини кэлиэҕиттэн үлэбит-хамнаспыт сааһыланан, киһи эрэ барыта үөрэ үлэлиир усулуобуйата үөскээтэ» дэһэллэр. Устуудьуйаҕа уопсайа 7 ыстаат көрүллэр эбит.

Улуус олоҕун, сонуннарын, интэриэһинэй дьонун-сэргэтин туһунан күннэтэ Ньурба уонна «Саха» тэлэбиидэнньэтигэр кэпсииллэрин таһынан, быйыл, саҥа «Профи» диэн биэриилэммиттэр. Бу биэриини айар талааннаах, монтаж эгэлгэ албаһын толору баһылаабыт Эдуард Васильев ыытар. Кини Санкт-Петербурдааҕы киинэ уонна тэлэбиидэнньэ университетын бүтэрэн эрэр, туох баар устууну сүрүннүүр, оператордыыр.
Иккис оператор Василий Иванов эмиэ ол университекка үөрэнэр.
«Профи» биэриини Роман Саввинов, форматы кытта истиили бэркэ дьүөрэлиир суруналыыс дьоҕурдаах эдэр уол, ыытар эбит. Эдгар Николаев устар-монтажтыыр үлэҕэ саҥа ылсан дьарыктанан эрэр эдэр уол.
Ньурба устуудьуйатыгар икки кэрэ кыргыттар — Матрена Слепцова уонна Валентина Кириллина — солбуллубат дииктэрдэр. Матрена Слепцова, устуудьуйа тэриллиэҕиттэн үлэлээбит буолан, ыытар биэриилэрэ олус табыллаллар эбит. Оттон Валентина Кириллина эмиэ Дьокуускайга «Саха» НКИК-кэ бэйэтигэр буспут-хаппыт буолан үрдүк таһымнаах үлэһит.
Устуудьуйа суоппара Андрей Николаев эмиэ, ыытан элэҥнэтэн, киһи мыыммат үлэһитэ үһү.
Быһата, бары да үүнүү-сайдыы суолугар бигэтик үктэнэн эрэллээхтик иннилэрин диэки баран иһэр эдэр дьон эбит.
«Профи» биэрии сүрүн анала – профориентация. Ыйга биирдэ тахсар, хатыланар. Устуудьуйа үлэһиттэрэ Ньурба ыччата ханна баран үлэлиэн, олоҕун оҥостуон сөбүн чинчийэн-үөрэтэн, Мииринэйгэ, Накыыҥҥа, Чернышевскайга баар бырамыысыланнас тэбэр сүрэҕэ буолбут тэрилтэлэргэ сылдьан устар, анал идэлээх дьону кытта бэсиэдэлэри ыытар эбиттэр. Быһата, улуус ыччатын профориентациятыгар улахан кылааты киллэрэллэр.
Айар састаап сылын аайы уопутуран иһэр. Ол курдук, 2007 с. өрөспүүбүлүкэтээҕи киинэ I бэстибээлигэр Эдуард Васильев «Ада» киинэтэ хас да номинацияҕа бастаабыт, ону таһынан «Бастыҥ уус-уран киинэ» аатын ылбыт. Ол киинэ быйылгы «Саха» НКИК ыыппыт уус-уран киинэлэрин күрэҕэр эмиэ бастыҥнар ахсааннарыгар киирдэ. Уһуллубут киинэ ол эрэ буолбатах. Инникитин уолаттар уус-уран киинэ устуутугар лаппа ылсар былааннаахтар.
Былырыын ыытыллыбыт Бүлүү бөлөх улуустарын тэлэбиидэнньэтин сэминээрэ Ньурбаҕа буолбута. Манна Сунтаартан, Бүлүүттэн, Үөһээ Бүлүүттэн, Мэҥэ Хаҥаластан, Дьокуускайтан «Саха» НКИК үлэһиттэрэ уонна суруналыыстар сылдьыбыппыт. Тэрээһини аҕыйах састааптаах Ньурба тэлэбиидэнньэтэ бэрт тэрээһиннээхтик, көхтөөхтүк, үрдүк таһымҥа ыыппыта. Эдэр дииктэрдэр, режиссердар уонна оператордар бастыҥ үлэлэрин иґин наҕараадаламмыттара.
Тэлэбиидэнньэни сэргэ ньурбалар араадьыйаны эмиэ истэллэр. Ньурба араадьыйата нэдиэлэҕэ иккитэ кэпсиир-ипсиир, эрэдээктэр Петр Федоров — Сө Суруналыыстарын сойууһун чилиэнэ, үөрүйэх суруналыыс.
Эдэр кэлэктиип күлэ-үөрэ, сүүрэ-көтө бэрт эйэлээхтик, тэтимнээхтик үлэлии сылдьарын киһи көрө-көрө үөрэр, дуоһуйууну ылар. «Саха» НКИК Ньурбатааҕы филиалын эдэр, эрчимнээх кэлэктиибэр дьолу-соргуну, үрдүк ситиһиилэри баҕарабыт.
Комментарии
Сообщение:
Отправить Отмена