Ил Түмэн тутууга уонна дьиэ-уот, коммунальнай хаһаайыстыбаҕа сис кэмитиэтин бэрэссэдээтэлэ Николай Костромин бу күннэргэ Москваҕа буолан ааспыт «Ыраас уу-2010» норуоттар икки ардыларынааҕы форумҥа кыттан кэллэ.
Форум иккис төгүлүн ыытыллар, бу сырыыга «Уу – сайдыы сүҥкэн ресурсата» диэн девизтээх ааста.«Тэрээһиҥҥэ дойдубут салайааччылара – бырабыыталыстыба бэрэссэдээтэлэ Владимир Путин, Госдума спикерэ Борис Грызлов, дойду министиэристибэлэрин, биэдэмистибэлэрин салайааччылара, регионнар бэрэстэбиитэллэрэ, уу хаһаайыстыбатын тэрилтэлэрин салайааччылара, уунан хааччыйыы, ууну ыраастааһын эйгэтигэр саҥа технологияларынан дьарыктанар хампаанньалар специалистара кытыннылар. Мин Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Афанасий Софронеевтыын сырыттым», - диэн кэпсээтэ Николай Костромин.
Кини кэпсээбитинэн, форум уу ресурсаларын харыстааһыҥҥа, Россия олохтоохторун ыраас иһэр уунан хааччыйыыга өйү-санааны, күүһү-күдэҕи түмэргэ туһуламмыт.
Тэрээһиҥҥэ Россия регионнарыттан уонна аан дойду 47 судаарыстыбатыттан, ол иһигэр Германияттан, Италияттан, Канадаттан, Сингапуртан, Францияттан, Японияттан – делегаттар кэлбиттэр. Форум чэрчитинэн ыытыллыбыт быыстапкаларга 34 тэрилтэ кытынна.
«Ыраас иһэр уу боппуруоһа билигин аан дойду үрдүнэн сытыытык турар. Быйыл аҥардас Россия 38 регионугар кураан туран, дьон-сэргэ улаханнык эрэйдэннэ. Нэһилиэнньэбит улахан аҥара иһэр уутун ыраас диир табыллыбат. Ол иһин форум кыттааччылара «Ууну туһаныы, уунан хааччыйыы туһунан» федеральнай сокуон бэлэмнэнэн ылыллыан наада диэн санааҕа кэллибит», - диир Ил Түмэн депутата.
Форум кэмигэр опыт атастаһыы буолбут. Москва уонна Санкт-Петербург куораттарга олохтоохтору ыраас иһэр уунан хааччыйыыга улахан үлэ ыытыллар эбит. «Холобур, Санкт-Петербург куоракка биир кварталга бүтүннүү эксперимент быһыытынан уунан хааччыйыы саҥа ситимэ олохтоммут. Ол түмүгэр энергияны туһаныы 42 бырыһыан, уу ситимин алдьаныыта, саахалланыыта 38 бырыһыан, уу сүтүгэ 7 бырыһыан аччаабыт», - диэн кэпсээтэ Николай Костромин.
Форум кыттыылаахтара уу хаһаайыстыбата сайдыытын научнай, техническэй, тэрээһин проблемаларын, быраап өттүттэн хааччыйыы боппуруостарын, аныгы технологиялар инвестициялары тардарга сөптөөх климаты олохтуур туһунан теманы дьүүллэстилэр.
«Маны таһынан, оҕо аймаҕы ууну харыстыырга үөрэтэр наадата бэлиэтэннэ. Чуолаан, оскуолаларга, оҕо саадтарыгар анал уруоктары киллэрэр, үөрэтэр пособиены айар наадатын туһунан этилиннэ», - диэн кэпсиир депутат.
Кини бэлиэтээбитинэн, РФ бырабыыталыстыбатын бэрэссэдээтэлэ Владимир Путин бэйэтин дакылаатыгар дойдуга уу эйгэтигэр туох үлэ ыытыллыахтааҕын туһунан чуолкайдык эппит. 2020 сыллаахха диэри уу стратегията бэлэмнэммит, ол чэрчитинэн элбэх үлэ ыытыллыахтаах. 2011-2017 сыллардаах «Ыраас уу» федеральнай тус сыаллаах тосхолу олоххо киллэрэргэ бастакы үс сылга 9 миллиард ыытыллыа.
Дойду үрдүнэн уу хаһаайыстыбатын комплексын саҥардыы киэҥ далааһыннаахтык барыаҕа – нуорма-быраап базата, уунан хааччыйыы инфраструктурата бука барыта уларытыллыаҕа.
Ил Түмэн пресс-сулууспата.
Комментарии
Сообщение:
Отправить Отмена