«Урукку «Детский мир» маҕаһыыҥҥа «МФЦ» диэн саҥа тэрилтэ арыллыбыт. Онно Дьокуускай куорат чэрчитигэр эбэтэр таһыгар быраҕыллыбыт учаастак булан аҕаллахха, докумуонун оҥорон биэрэллэр үһү», — диэн сурах-садьык уос номоҕо буола сылдьар. Төһө кырдьыга-сымыйата эбитэ буолла... Баһыйар үгүстэрэ: «Булан аҕаллаххына, хаһаайыннаах эбит диэн баран, ол сиргин биэрбэттэр», — диэн хайыы-үйэ тааллара кырыыламмыт. Онон, аны, «сымыйа үһү» диэн сурах куораты биир гынна. Маннык кэпсэтиини иһиллии сатаан баран, бу сурах-садьык төһө оруннааҕын бэйэлэриттэн ыйыталаһа тиийдим.

Дьокуускай куоракка быһааскыттан «МФЦ» диэн элбэх хайысхаҕа дьарыктанар киин тигинэччи үлэлээн эрэр. Бу киин, дьиҥэ, өрөспүүбүлүкэни барытын хабыахтаах диэн. Быһата, дьиэлэниэн, даачаланыан, сирдэниэн баҕарар киһи сайабылыанньатын тута-тута судаарыстыба элбэх чунуобунньугун аанын тоҥсуйбатын диэн тэриллибит. Ол аата, Киин – норуот уонна былаас икки ардыгар далаһа курдук буолар. Сайабылыанньалаах дьон туох баар докумуоннарын барытын бу кииҥҥэ аҕалан биэрэллэр. Киин кинилэр сайабылыанньаларын, докумуоннарын тустаах сиргэ тиэрдэр. Онон син табыгастаах тэрилтэ диэххэ сөп. Хас тойон, үлэһит аанын тоҥсуйан үүрүллүөх кэриэтин анал үлэһиттэргэ илдьэн биэрбит быдан судургу бөҕө буоллаҕа. Киин сүрүн соруга диэн – бу киирбит сайабылыанньалары олохтоох былааска, туһааннаах тэрилтэлэргэ тиэрдэр. Туох баар быһаарыыны барытын ол тэрилтэлэр быһаараллар.

Муус устар 20 күнүттэн саҕалаан күн бүгүҥҥэ диэри, уопсайа 14200 киһи билсэ сылдьыбыт. Онуоха 5418 киһиэхэ тылынан сиһилии быһааран, сүбэ-ама биэрбиттэр. 4490 сайабылыанньа тустаах тэрилтэлэргэ утаарыллыбыт, 3210 киһи сайабылыанньатын түмүгэ биллибит. Тэрилтэлэр уонна көннөрү дьон-сэргэ бу Киин иһинэн сир боппуруоһугар, социальнай, урбаан (предпринимательство) эйгэлэригэр, уопсайа 72 судаарыстыбаннай уонна муниципальнай өҥөнү ылыахтарын сөп.

Бэйэҕит да сэрэйэн эрдэххит буолуо, саамай элбэх сайабылыанньа сиргэ бэриллибит. Ким бас билэр сирдэниэн, учаастактаныан баҕарыа суоҕай? Сайаапкалаах киһи докумуона сатаммат буоллаҕына эбэтэр атын да төрүөтүнэн аккаас биллэриллэр. Оччоҕо Киин аккаас төһө оруннааҕын көрөр-истэр, бэрэбиэркэлиир. Үлэлээбитин тухары 636 аккаас киирбит буоллаҕына, Дьокуускай куораттааҕы Сир кэмитиэтэ 412 сайабылыанньаны аккаастаабыт. Биллэн турар, сир боппуруоһугар. Эспэртиисэ түмүгүнэн 142 аккаас “олоҕо суох” диэн буолбут. Инньэ гынан, күн бүгүҥҥэ диэри олохтоох уорганы кытары быһаарса сылдьаллар.

Дьон-сэргэ уос номоҕо оҥосторун курдук, сир боппуруоһун барытын бу Киин быһаара олорбот эбит. Сир кэмитиэтэ бэйэтэ эрэ быһааран эрдэҕэ. Ол гынан баран, туох да диэбит иһин, Кииммит сайабылыанньалаах киһиэхэ син дурда-хахха буолар быһыылаах.

kyym.sakha.ru
23.09.2010 11:19 | оригинал статьи | просмотров: 20730