Балаҕан ыйын 4 күнүгэр Дьокуускай куорат төрөөбүт күнэ бэлиэтэннэ. Московскай уулуссаҕа куорат 378 сылыгар аналлаах бырааһынньыктааҕы тэрээһин буолан ааста.
Маннык тэрээһиҥҥэ быйыл аан бастаан Дьокуускай уонна Ленскэй епискоба Илия кыттыыны ылла. Таҥара үтүө санаатын, эйэни уонна эрэйэ-буруйа суох дьоллоох олоҕу баҕарда. Мээр Юрий Заболев епископ үтүө тылларыгар кыттыһан туран, эйэни баҕарда уонна бэйэ-бэйэҕэ болҕомтолоох буоларга, куораппыт биир бастыҥ куорат буоларыгар дьулуһурга ыҥырда.
Президент уонна правительство аатыттан эҕэрдэ тылы правительство председателин солбуйааччы Феодосия Габышева эттэ. Кини аны икки сылынан Дьокуускай 380 сылын бэлиэтиирбитин, ити сыл «Россия — спортивнай держава» аан дойдутааҕы спортивнай форум, «Азия оҕолоро» V норуоттар икки ардыларынааҕы спортивнай оонньуулар былааннаналларын санатта. Онуоха диэри республикабыт тэбэр сүрэҕэр саҥа спортивнай комплекстар, оскуолалар, оҕо садтара тутуллуохтара, тимир суол кэлиэҕэ, саҥа микрооройуоннар баар буолуохтара, диэтэ.
Эҕэрдэ тылларын итини сэргэ Ил Түмэн председателин солбуйааччы Андрей Кривошапкин уонна Куорат мунньаҕын председателэ Александр Саввинов эттилэр.
Официальнай тэрээһин концердынан, бастакы кылааска киирбит кырачааннар уонна эдэр ыаллар парадтарынан салҕанна. Бырааһынньык фейерверкэнэн түмүктэннэ. СИА
Комментарии
Сообщение:
Отправить Отмена