Саха Өрөпүүбүлүкэтин Кадры бэлэмниир, аттарар, билгэлиир департаменын отделын салайааччыта Альберт Соров этэринэн, кэлиҥҥи кэмҥэ орто үөрэххэ туттарсар ыччат ахсаана биллэ эбиллибит. Департамент 2006 сылтан саҕалаан авиация, мелиорация, гидромет, геология, тимир суол, олох-дьаһах коммунальнай хаһаайыстыбатын специалистарын бэлэмнэттэрэ ыччаты өрөспүүбүлүкэ таһыгар үөрэттэрэ ыытар.

-- Урут, омуннаан эттэххэ, уулуссаҕа тахсан хаһыытаан ыҥыра сыһа-сыһа орто үөрэххэ оҕолору сүүмэрдиир этибит. Киһи барыта үрдүк үөрэххэ талаһара. Билигин, орто үөрэх ордук сыаналанар буолла. Үрдүк үөрэхтээҕэр куонкурустанна, биир миэстэҕэ 4-5 оҕо күрэстэһэр.
Киһи барыта кыанар буолбатах. Олохпут-дьаһахпыт таһыма наһаа мөлтөх. Ол иһин, ону өйдөөн, оҕолор орто үөрэҕи ылан баран, үлэлии-үлэлии кэтэхтэн үрдэттэр буоллулар. Холобур, тимир суол исписэлиистэрэ техникуму бүтэрэн биһиэхэ кэлэн үлэлии сылдьаллар. Уонна үксүлэрэ кэтэхтэн университекка үөрэнэллэр. Хамнастара кэлэ турар, суоллара төлөнөр. Үчүгэй буолбат дуо? Хамнастаах дьон буолан, бэлиэр төрөппүттэригэр көмөлөһөн эрэллэр.
Үчүгэйэ диэн, биһиги, үрдүк үөрэххэ быһа үһүс кууруска киирэр бырааптаах техникумнары, колледжтары кытары үлэлэһэбит. Онон оҕолор, техникуму бүтэрэн баран быһа үһүс куурустан киирэн үөрэнэллэр.
Аны саамай үчүгэйэ диэн, орто үөрэх практиката элбэх. Ол иһин үөрэнэргэ интэриэһинэй. Холобур, Хабаровскайга уонна Тыындаҕа тимир суол үлэһиттэрин үөрэттэрэбит. Баазалара аһары сайдыылаах. Бүтүн локомотив оҥоһуута, тутула барыта көстөр гына аҥаарданан турар үөрэтэр оборудованиелаахтар.
Департамент Саха сиригэр бэлэмнэммэт идэлэргэ ыччаты ыытан үөрэттэрэр. Авиатордар эрдэ биэнсийэҕэ тахсаллар. Бары биир кэмҥэ үлэлии кэлбит дьон, бары тэҥ саастаахтар. Онон эмискэ авиатора суох буолан хаалар кутталлаахпыт. Авиация идэтигэр бэлэмниир Москватааҕы үөрэх кыһатын кытары үлэлээбиппит саҥа сэттис сылыгар барда. Субу саҥардыы бүтэрэн кэлэн эрэллэр. Орто сүһүөх персонал букатын тиийбэт.
Онон эһиил оскуоланы бүтэрэр оҕолор, идэҕитин, үлүбээй үрдүк үөрэх эрэ буоллун диэн быһымах санаанан салайтарбакка талыҥ. Хамнастаах, үлэ буларга дөбөҥ идэлэри талыҥ. Үлэһит киһи буолан, ийэҕитигэр-аҕаҕытыгар көмөлөөх дьон буолуҥ.
kyym.sakha.ru
01.09.2010 15:01 | оригинал статьи | просмотров: 18725
Комментарии
Сообщение:
Отправить Отмена