Атырдьах ыйын 28 күнүгэр буолбут Саха өрөспүүбүлүкэтин социальнай-экономическай сайдыытын уустук боппуруостарыгар аналлаах мунньах кэнниттэн РФ үпкэ миниистирэ Алексей Кудринтан федеральнай киин Саха сиригэр сыллата төһө үбү тыырар кыахтааҕын ыйыттылар.
РФ вице-премьерэ: «10 млрд солк. курдук, - диэтэ уонна - Ити эбии үп. Бюджет 3 сылга болдьохтоон оҥоһуллар, онон 30 млрд солк. курдук буолар», - диэн быһааран биэрдэ. СӨ бэрэсидьиэнэ Егор Борисов Саха сирэ аҥаардас федеральнай тус сыаллаах программаларынан 20 млрд солк. ыларын бэлиэтээтэ.
Кудрин федеральнай бюджеттан донор-регионнар эмиэ үбүлэниэхтэрин сөп диэтэ. Ол эбэтэр, бары социальнай эйгэлэри хабан туран, бэйэлэрин хааччынар субъектар. Холобура, Москва уонна Петербург кэккэ объектара федеральнай бюджет суотугар тутуллаллар. «Федеральнай объектары тутууга харчы киириитин уонна ол сөптөөхтүк көрүллэрин хааччыйыахтаахпыт», - диэтэ Алексей Леонидович.
Уонна, холобур быһыытынан, бензин акциһа улааппытын, Федеральнай суол фондата тэриллибитин бэлиэтээтэ. 5-7 сыл иһигэр федеральнай суол объектарын көрүү-истии ирдэбил 70% диэри тиэрдиллиэхтээх, ол эбэтэр суол барыта эриэ-дэхси буолара ситиһиллиэхтээх. Бу туһунан СИА кэпсиир.
Комментарии
Сообщение:
Отправить Отмена