Атырдьах ыйын 10 күнүгэр Дьокуускай куорат суутун судьуйата Михаил Макаров, Иван Старостин үҥсүүтүн көрдө. Старостин бииргэ төрөөбүт быраатын Петр Старостины баһааҕырдыбыт «Якутск вечернэй» хаһыат суруналыыһын Инна Федорованы үҥсүбүтэ.

Милииссийэбит миниистирэ Яков Стахов «ыстаанын» туһунан коллегабыт Виктория Габышева «Ваше-право» хаһыакка элбэхтик суруйда. Виканы көрсүбүт билэр дьон бары «Стахов баччааҥҥа диэри тоҕо уурайа илигий?» -- диэн ыйытабыт. Киһибит күлэ-күлэ: «Уонна туох ыйытардааххын?» -- диэн кэбиһэр. Бу соторутааҕыта эмиэ В.Габышева миниистир Стахов туһунан матырыйаала таҕыста. Санатар эбит буоллахха, Эбээн-Бытантай оройуонугар ИДьМ миниистирэ Яков Стахов ыалдьыттыы бара сылдьан, эчэйэн төннүбүтүн туһунан бары иһиттэххит. Улахан тойон буута дьөлө барбытыгар улахан араллаан тахсыбыта. Быһылаан кэнниттэн тоҕус ый ааспытын кэннэ, буруйдаах киһи «төрөөн» түспүтэ. «ЯВ» хаһыакка «Тайна покушения на министра Стахова раскрыта» диэн ыстатыйаҕа «Петр Старостин диэн киһи миниистири буукка ыппыт» диэн суруллубута. Старостин кырдьык миниистири ыппыта буолуо дуо? «ЯВ» суруйбутунан, «Петр С. бэйэтигэр тиийиниэн аҕай иннинэ, икки олохтоох дьоҥҥо: «Саккырыыр таһыгар милииссийэлэр джиптарын ытыалаабытын», -- кэпсээбит. Өссө ол массыынаны ыппыт саатын «ойуурга бырахтым» дэттэрбиттэр. Биллэн турар, Старостин дьоно, соторутааҕыта көмпүт уолларын олоҕо суох буруйдаабыттарыгар улаханнык кыйытыннахтара дии. Суруналыыстыын, миниистирдиин, редакциялыын – барыларын куолуу тутан суукка үҥсүбүттэр. «Стахов», «карабин», «Петр Старостин» Быйыл олунньу 17 күнүгэр Дьокуускайтан Виталий Дубенко уонна Андрей Дягилев диэн опердар, бокуонньук Петр Старостин дьонугар тиийэ сылдьыбыттар. Петр эдьийин Евдокияны кытары кэпсэппиттэр. Милииссийэлэр боппуруостарыгар сотору-сотору «Стахов» диэн аат күөрэйэрин, ийэлэрэ эмээхсин хоско сытан иһиллии олорбут. Дягилев кэпсэтии түмүгэр: - Яков Стаховы үлэтиттэн ууратыахтарын баҕараҕыт дуо? Кини буруйа суох, министерскайдар иирсэллэр, дуоһунас былдьаһыыта бара турар, -- диэбит. - Онно биһиги туох кыттыгастаахпытый? Тоҕо биһиги онтон эмсэҕэлиэхтээхпитий? Ол «министерскайдаргыт» бэйэлэрэ быһаарыстыннар, биһиги өлбүт бырааппытын, дьиэ кэргэммитин тыыппатыннар, - диэн Евдокия хадарбыт. - Чэ, оччоҕо быһаарсыахпыт! – диэн Дягилев сааммыт. Итинтэн саҕалаан Кустуур олохтоохторугар нүһэр күннэр саҕаламмыттар. Саастаах, инбэлиит киһини -- Александр Колесовы «Петр көрдөһүүтүнэн карабиммын киниэхэ биэрбитим» диэн сымыйа көрдөрүү ыла сатаабыттар. Онтукалара баара, Колесовтара бастакы карабинын былыр үйэҕэ сүтэрбит дьыалата эбит. Оттон иккис карабинын төттөрү туттарбытын туһунан докумуоннаах эбит. Кырдьаҕас киһини өссө төһө уһуннук түүрэйдиэхтэрэ биллибэт. Хата, ону орон-тэллэх буола сытар ойоҕо үнтү ааттаһан арахпыттар. Олохторун устата формалаах нууччалары көрбөтөх кырдьаҕастар, ити түбэлтэ кэнниттэн улаханнык уйулҕалара көппүт дииллэр. Сотору буолаат, эмээхсин өбүгэлэригэр бараахтаабыт. Олохтоохтор этэллэринэн «кэлии дьон түүрэйиттэн түргэтээбит». Бу дьиикэйдэрин көрүҥ эрэ! Тыа, түҥкэтэх дьоно эрэйдээхтэри сэнээн кэбилээтэхтэрин... Тойоннорун саба сатаан «карабин», «Петр Старостин» уонна «Стахов» диэн тылларга тугу эмэ сыбыы сатаан дьону куттаатахтара. Виктория Габышева сабаҕалааһынынан «Яков Стахов бааһа, дьиҥинэн, дьиэ иһинээҕи быһылаантан төрүөттээҕэ буолуо, ону сурах тарҕана охсон, «саанан ытыыга» кубулуйдаҕа» диир. Миниистир диэн миниистир. Босхо доруобуйатын энчирэппэт. Стахов ол «ытыллыбытын» суотугар улахан суумаҕа страховка харчытын ылбыт. Дьэ, ол иһин араастаан «буруйдааҕы була» сатаатахтара. Суут кырдьыгы таһаарда «ЯВ» суруналыыһа Инна Федорова Петр Старостины сымыйанан буруйдаах оҥорон суруйбутун иһин 50 тыһ. солкуобайга редакциятын кытары ыстарааптаммыт. Виктория Габышева «Штаны министра» диэн суруйуутугар икки экспертизэ түмүгүнэн, Стахов баккыта буулдьа суолуттан буолбакка, уһуктаах тимиринэн дьөлө анньыллыбытын дакаастааммыт. Тойонун баккытын кырдьыктаахтык чинчийбитин иһин, Дьокуускайдааҕы бюро судмедэкспердэ Прокопий Левин, атын миниистиртэн – Адександровтан (Доруобуйа харыстабыла) быыгабар ылбыт. Өссө Бюро начальнигар «Левины штаттан таһаар» диэн дьаһайбыт. Александров уонна Стахов биир баайыыга сылдьалларын туоһулуур дьаһал дуу, тугуй? Яков Стахов Старостиннар дьиэ кэргэттэригэр бырастыы гыннарыа дуо? Вика даҕаны, биһиги даҕаны олус саарбахтыыбыт. Үрдүк өһүөлээх, киэҥ тиэргэннээх ханнык эрэ Эбээн-Бытантай биир кырыы нэһилиэгин дьонугар кымаардаан да көрбөтө буолуохтаах. Суукка Стахов кэлэ сылдьыбатах. Дьиҥинэн, сокуону араҥаччылыыр киһи сокуону убаастыахтаах этэ. Миниистир турбат ыала буоллубут быһыылаах Стахов иннинэ ИДьМ миниистиринэн эмиэ бэрт айдааннаах киһи кэлэн барбыта. «Орто дойду» комплекс баһылыгын эккирэтэ сылдьан кырбаан, ол быһылаана дьон-сэргэ истиитигэр тахсан, улахан айдаан күөдьүйэн, онтон «бүдүрүйэн» этэҥҥэ тэскилээбитэ. Стаховпыт эмиэ «дьикти» киһи буолан биэрдэ. Уонна ити кэннэ «варягтар имиджтэрэ» хайаан түһүө суоҕай? Хаһан киһилии милииссийэлэнэрбит буолла…

kyym.sakha.ru
19.08.2010 10:33 | оригинал статьи | просмотров: 25788