Ыам ыйын 22 күнүгэр Дьокуускай куорат хабыллар-хаба ортотугар буолбут, киһини дьиксиннэрэр быһылаан туһунан тутатына суруйан турардаахпыт.
Ыам ыйын 22 күнүгэр Дьокуускай куорат хабыллар-хаба ортотугар буолбут, киһини дьиксиннэрэр быһылаан туһунан тутатына суруйан турардаахпыт. Ол курдук, 59 саастаах дьахтар Горького 92 №-дээх дьиэтиттэн тахсан истэҕинэ төбөтүгэр шлакоблок кэлэн түһэн суорума суолламмыта.
Шлакоблогу подьезд түннүгүттэн төрдүс уонна бэһис этээс икки ардыттан ким эрэ бырахпыта биллибитэ. Силиэстийэ билиһиннэрэринэн, 26 саастаах Кириэс-Халдьаайыттан сылдьар эдэр киһи бу дьиэҕэ квартира куортамнаан олорбут. Ол күн арыгылаан баран подъездка сылдьар куоскалары шлакоблогунан быраҕаттаан «аралдьыйбыт». Төрдүс уонна бэһис этээс икки ардыгар шлакоблок кирилиэстэн тэйэн түннүккэ кэлэн түспүт. Таһырдьа тахсан, киһи эчэйэн айдаан буола турарыгар наадыйбакка, бара турбут.. . «Киһи өлүө дии санаабатаҕым», - диир да, билигин буруйун билиммит.
Оттон биһиги куорат олохтоохторугар туһаайан сэрэнэн сылдьыҥ диэн сүбэлиибит. Сүрэҕэ суохтар оннооҕор бытыылкалары түннүгүнэн быраҕар түгэннэрэ баар, олор дьон сырдык тыыныгар туруохпут диэн төбөлөрүгэр оҕустаран да көрбөттөрө буолуо.
