Ил Түмэн пресс-киинигэр Виталий Басыгысап суруналыыстары мунньан брифинг ыытта. Аҕыйах хонуктааҕыта Москваҕа буолан ааспыт Арассыыйа сокуонньуттарын президиумын асамблейатыгар кыттан кэлбит.
![](/images/ya1/2010-07-02/269172/181143.jpeg)
Ассамблея сүрүн үлэтэ Арассыыйа регионнара оҥорбут сокуон бырайыактарын ырытан, үчүгэйдэрин талан бырабыытыластыбаҕа көрүүгэ ыытар. Саха сирэ мунньахха хас да саҥа сокуон бырайыактарын көрдөрбүт, мантан сүрүннэрин ааттаатахха манныктар: «Хоту табалары иити туһунан» уонна «Арассыыйа сирин бүтүн районированията». Виталий Николаевич этэринэн, бастакы сокуон техническэй уонна үп-харчы эрэ өттүн буолбакка, социальнай өттүгэр, табаһыттар олохторугар улахан болҕомтону уурар. Билиҥҥи кэмҥэ ити боппуруоһу быһаарар сокуон таба иитиитин тыа хаһаайыстыбатын биир көрүҥүнэн көрөр, онуоха таба иититэ диэн дьон олоҕун суолтата. Нэһилиэнньэ өбүгэлэрин үгэстэриттэн туораабатын курдук, судаарыстыба кинилэри өйүөхтээх уонна харайыахтаах.
Соҕуруу сайдыылах дойдуларга билигин таба этигэр, муоһугар улаханнык наадыйаллар. Техническэй өттүн таарыйдахха, хас биирди ыалга компьютер, спутниковай төлүпүөн, күн батарыайата, интернет ыларга, холбуурга уопсайа 300 тыһ. кэриҥэ солкуобай наада, сокуон ылылыннаҕына, федеральнай бюджет харчытын уйунуохтаах. Иккис сокуон биһиги өрөспүүбүлүкэбит олоҕор, дьонугар биир саамай наадалах, сүрүн бырайыак эбит. Судургутук быһаардахха маннык, билигин ылар хамнаспыт Арассыыйа соҕуруу уонна киин оройуоннарыттан 40% үрдүгүн бары да билэрбит буолуо. Дойду таһымыттан көрдөххө, сокуон бу өттүгэр ыһыллаҕастык үлэлиир, хас биирдии субъект индексацияны хайдах баҕарынан туруорар эбит, холобур, Хабаровскай кыраай хотугу оройуоннарыгар хамнастара 70% үрдүк, оттон биһиги соҕуруу улуустарбыт индексациялара кинилэрдээх кыра, оннооҕор Волга өрүс тардыытынан 70% үрдүк хамнастаах оройуоннар бааллар үһү. «Сокуон олоххо киирдэҕинэ, Арассыыйа үрдүнэн барытынан централизованнай индексация баар буолуо этэ» - диир Виталий Басыгысап. Правовой эрэ буолбакка харчы өттө эмиэ баар буолара биллэр, билигин өрөспүүбүлүкэ бэйэтин бюджетыттан төлүүр эбит, оттон сокуону ылыннахтарына, федеральнай бюджет төлүө этэ диэн санаатын эттэ бырабыытылыстыба бэрэссэдээтэлэ. Бэтинэн бэт даҕаны, сокуон бырайыактарын Судаарыстыбыннай Дума ылынара уонна олоххо киллэрэр түгэннэрэ бытаан уонна аҕыйах. Ол да буоллар кэтэһэ саныыбыт.
kyym.sakha.ru
02.07.2010 18:08 | оригинал статьи | просмотров: 73662