Бэс ыйын 28 күнүгэр Е.Борисов дьиэ-уот тутуутугар, суолу-ииһи тупсарыыга туһуламмыт сүбэ мунньаҕы ыытта.
Тутуу миниистирэ С.Дереповскай эппитинэн, суол үлэтэ киин куоракка түөрт хайысханан барар: Бүлүүлүүр суолга (ГАИ пуоһун атта), Лермонтов уулуссатын кэҥэтии (Петровскай-Каландаришвили уул.), Поярков уулуссатын «Юность» стадиоҥҥа диэри аспаалынан бүрүйүү (2012 с. түмүктэнэр), Сайсары күөлү туоруур муостаны тутуу (сэтинньигэ саҕаланар). Бэтэрээннэргэ аналлаах 70 кыбартыыралаах дьиэ үлэҕэ киирдэ. ИДьМ үлэлиир дьиэтин тутуу бүтэн эрэр. Алын уонна орто сүһүөх үөрэх кыһаларын устудьуоннарыгар уонна уһуйааччыларыгар аналлаах уопсай дьиэ, 72-с кыбартаалга 190 кыбартыыралаах дьиэ тутуута түмүктэнэрэ чугаһаата. Пассажир терминалын уонна 3 тыһыынча миэстэлээх сабыылаах спорт комплексын тутуу саҕаланна. Балаҕан ыйыгар Богородицкай таҥара дьиэтэ уонна духуобунай училище үлэҕэ киириэхтээхтэр.
Куорат баһылыга Ю.Заболев иһиттиннэрбитинэн, уулусса өрөмүөнүгэр 136 мөл. солк., дьаама өрөмүөнүгэр 8 мөл. солк. көрүллүбүт. 5 сыл иһигэр 276 хаарбах дьиэ көтүрүллүбүт, өссө 464 хаалбыт.
Аҕа баһылык кэлэр икки сыллааҕы үлэ 2012 с. Дьокуускайга ыытыллыахтаах «Арассыыйа – спорт державата» норуоттар икки ардыларынааҕы форуму кытары ыкса ситимнээҕин ыйда. Санаттахха, бу форуму ыытар туһунан дьаһалы ыам ыйын 31 күнүгэр Д.Медведев таһаарбыта. Форум кэмигэр «Азия оҕолоро» V оонньуу ыытыллыахтаах.
