«Алмаастаах кыраай киин куората – Дьокууускай», «Дьоллоох Дьокуускай» төрөөбүт куораппытын араастаан хоһуйан этээхтиибит даҕаны, уулуссаларбыт туруктара дьэ, сир баайыттан улаханнык туһамматах көрүҥнээхтэр.
Президент суол-иис, дьиэ-уот боппуруоһугар дьону мунньан мунньахтаата. Онно тутуу миниистирэ С.Дереповскай Чайковскай уулуссаттан Бүлүүлүүр аартык айаҕар турар ГАИ поһугар диэри тиэрдэр суолу оҥоруохтаахтарын эттэ. Ону сэргэ Лермонтов уулусса Петровскайтан Каландарашвилига диэри учаастагар суол кэҥиэхтээҕин бэлиэтээтэ. Кыһын, сир тоҥмутун кэннэ Сайсары күөлү уҥуордуур муоста тутуута саҕаланыахтаах эбит.
Быйыл «Юность» стадионуттан Автодорожнайга диэри Поярков уулуссата салгыы оҥоһуллубат буолла. Стадион түөлбэтигэр улахан сабыылаах спортивнай комплекс тутулла сылдьарынан сибээстээн, эһиилгигэ көһөрбүттэр.
Горькай уулуссатыгар тутулла турар, бастакы этээһигэр маҕаһыыннаах, 190 квартиралаах ветераннар дьиэлэрэ быйыл булгуччу үлэҕэ киириэхтээх диэн президент сорудахтаата. 2005 сыл кулун тутар 1-гы күнүгэр диэри уочаракка турбут ветераҥҥа бу дьиэҕэ 90 квартираны аныыр былааннаахтар.
Аппа уҥуор тутулла турар сүүнэ улахан Таҥара дьиэтэ, быйылгы сыл сүрүн тутуутунан ааттанна. Бу кэлимсэ тутуу аһыллыытыгар православнай итэҕэллээх дьон кылаабынай киһилэрэ Кирилл аҕабыыт кэлиэхтээх.
Билигин итэҕэл былаас өттүттэн өрө түтүллар кэмэ. Онон бу, Богородицкай таҥара дьиэтэ тутулуннаҕына, этэргэ дылы, өрөспүүбүлкэ «имиджэ» тупсуохтаах. Киин былааһы кытары кэпсэтии-ипсэтии көдьүүстээх өттүгэр салалларыгар тирэх буолуон сөп. Манна диэн эттэххэ, итэҕэл, ханныгыттан тутулуга суох, киһини-сүөһүнү бэрээдэктиир. Аныгы кырыктаах үйэҕэ итэҕэл тарҕанара хайаан да наада курдук. Син буруйу оҥоруу аччыа этэ.
